अर्घाखाँचीमा नेपाल कम्युनिष्ट पार्टीको स्थापना र विकास

‘अर्घाखाँचीमा नेपाल कम्युनिष्ट पार्टीको स्थापना र विकास’ बुद्धि बहादुर रायमाझीले लेखेका हुन् । सन्धिखर्कको साबिक वडा नम्बर ८ मा जन्मिएका लेखक रायमाझी बर्रे संघर्ष (काण्ड)का एक पात्र पनि हुन् । त्यो घटना जसलाई नेपालको कम्युनिष्ट इतिहासमा बर्रे संघर्षको नामले चिनिएको छ भने विरोधी पार्टीहरूले चाहिँ त्यो कुनै संघर्ष नभै डकैती काण्ड थियो भन्ने गरेका छन् । जे भएपनि पञ्चायती शासनको अन्धकार कालमा गरिएको त्यो कामले सिंगो देश नै तरङ्गित बनेको थियो । त्यो कारवाहीमा संलग्न रायमाझीलगायत अन्य १३ जना युवकहरू प्रशासनबाट समातिएर जेल जानुपरेको वर्णन यो पुस्तकमा लेखकले गरेका छन् । लेखक स्वयम् पनि १३ वर्ष लामो कारावास भोगेर फर्किएका हुन् । 

इतिहासमा लेखिएको बर्रे घटनाका बारेमा बुझ्नका लागि यो पुस्तक निश्चय नै सहयोगी बन्ने छ । यतिमात्र नभै यो पुस्तक अर्घाखाँची जिल्लामा कम्युनिष्ट पार्टीको स्थापना र विकासका बारेमा २०१६ देखि २०७० सम्मको विभिन्न घटनाक्रमलाई पनि समावेश गरिएका कारण पठनीय र सङ्ग्रहणीय बनेको छ । इतिहास अन्वेषक, विद्यार्थी, शोधकर्ता र सामान्य पाठकलाई पनि यो कृतिले अवश्यै धेरै कुरा बुझ्न सहायता गर्नेछ ।

***

किताब : अर्घाखाँचीमा नेपाल कम्युनिष्ट पार्टीको स्थापना र विकास

लेखक : बुद्धि बहादुर रायमाझी

प्रकाशन मिति : वि. स. २०७१ असार

०